Dhikala mein Bumper Tiger Sighting | Discover Wild Paws Jim Corbett Dhikala Series Hindi 4K

55 лет назад

732 Просмотров

Aur aisa islie hai kyunki Sambar road pe baagh ki bohot achi sighting hoti hai. Aur zyada chaudi sadak na hone ke karan yahan pe haadse ke chances zyada hai. Islie van vibhag ne ye niyam laagu kiya hai ki aap sambar road pe gaadi ghuma ke wapas nahi jaa sakte. Kyunki wahan pe ek orr nadi hai aur dusri orr ghana jungle.

Bohot si gaadiyan main road pe khadi intezaar kar rahi thi. Hume nahi pata tha ki unhone kuch dekha ya suna tha, ya bass apni kismat aazmanein ki liye wahan ruki thi. Humne bhi inke saath yahin rukne ki sochi.

Agar aap gaadiyon ki position dekhen, toh aap bhi maanenge, ki yahan ke guide driver Vanya jeevon ki kitni izzat karte hain. Baaki parks ki tarah nahi jahan gaadi seedha baagh ke muh pe jaake laga di jaati hai, taaki guests zyada se zyada baksheesh den.

Dhikala mein jab bhi alarm calls aati hain, aur baagh ke aane ke sanket hote hain, toh gaadiyan dono orr park ho jaati hai aur kam se kam 100 meter ki jagah baagh ke guzarne ke liye chor deti hain.

Jab wahan pe baagh ka koi sanket nahi mila, toh sabhi gaadiyan idhar udhar badh gayi. Aur hum bhi grasslands ki orr nikal gaye. Baaki safari se compare karen toh iss safari mein humara bhi patience dagmaga raha tha. Baagh ko dekhne ki itni ichha thi ki hum bhi bass jungle ke har kone mein usko dhundh rahe the. Ye humari yahan pe aakhiri safari thi aur ab tak humko dhamakedaar sighting nahi hui thi.

Waise toh ye baagh ko dhundne ka acha tareeka nahi hai. Idhar udhar ghumne se kabhi baagh nahi milta. Baagh milta hai ruk ke jungle ki awaaz sunne se. aap jab bhi jungle aayen, itna samay leke aayen ki jungle ko ache se ghum payen.

Humse kayi log comments mein puchte hain ki wo Dhikala ki booking kaise kar sakte hain. Kyunki wo jab bhi check karte hain, koi bhi room available nahi milta. Aur agar agents se book karen, toh permit milna asaan ho jaata hai. Bass dikkat itni si hai, ki agents aapse permit ka 3 guna paisa lete hain. Humne aaj tak koi bhi safari agents se book nahi kari. Humesha khud hi karte hain.

Aur ye karne ka ek hi tareeka hai. Safari ka poora schedule pehle hi corbett ki official website pe aa jataa hai. Hum usse download karke rakh lete hain aur jiss din booking khulti hai, hum turant hi khud se booking karne ki koshish karte hain.

Dhikala mein Khud se night stay book karne ka ye ek-lauta tareeka hai. Permit milne ki koi guarantee nahi hai, par koshish karne mein koi nuksaan bhi nahi hai.

Toh jab hum jungle ki iss orr aaye, humare dhyaan sadak ke kinaare khude hue naale pe gaya. Ye van vibhaag ne khud kiya hai. Waise toh hume theek se nahi pata ki van vibhaag aisa kyun karta hai, par hume lagta hai ki iske do mukhya kaaran honge.

Kayi der rukne ke baad humari kismat thodi si badalne lagi. Ek driver ne bataya ki ramganga pul ke paas paaro ki ek bachi dikhayi di hai. Kyunki ye khabar har gaadi ko nahi mili thi, hum Dheere Dheere pul ki orr badhne lage.

Humne bhi sabko is lie nahi batyaa kyunki agar sabko pata lag gaya, toh baagh ko dekhne ka halka sa bhi jo avsar hai, wo bhi haath se nikal jaega. Kyunki jab ek saath gaadiyan tezi se baagh ki orr badhti hain, toh ghabra ke baagh jungle ke bahar hi nahi aata.
Hum chup chaap Ramganga ke kinaare intezaar karte rahe. Kayi baar safari mein, baagh dikhne ke kuch hi pal pehle, aapko ek feeling aane lagti hai ki bass bumper sighting hone hi wali hai. Aur hume bhi kuch aisa hi mehsoos ho raha tha. Koi alarm calls nahi, koi panjon ke nishaan nahi, par fir bhi mann mein bharosa tha ki aaj baagh dekhe bina huma devbhoomi se jaenge nahi.

Aur aakhir kaar wo pal aa hi gaya. Hum theek ussi jagah pahonch gaye jahan saari gaadiyan intezaar kar rahi thi. Wo Tigress ab uth chuki thi aur Ramganga ko cross karne wali thi. Aur hum sab bhi usko dekhne ke liye taiyaar the.

Dhikala ke khoobsurat jungle mein humari Royal Bengal Tigress. Paani itna saaf tha, ki aaine ko sharam aa jaye, aur usme padhe patthar jaise Bhagwan ke saamne padhe Phool. Aur fir dekhiye, iss bhoo-drishya ko. Agar aap ye frame kisi bhi wildlife lover ko dikhaenge, toh wo jhat se bata dega ki ye sirf aur sirf Dhikala ka frame hai.

Hume asha hai ki aap iss baaghin ko dekh paa rahe hain. Humne aapko waada kiya tha ki iss episode mein hum aapko bumper sighting dikhaenge. Toh wo bumper sighting yahi hai. Par fikr na karen, hum aapko is 4K footage dikahenge. Itna saaf ki aap iske shareer ki kaali dhaariyan bhi gin sakenge.

Sabse pehle, wo patharon pe chali aur aas paas nazar ghumayi. Isko Ramganga paar kar dusri orr jaana tha, aur hume, bina isko disturb kare, ache ache shots lene the. Baagh paani se nahi darta hai, par fir bhi jahan tak ho sake, isne koshish kari ki iske paer paani ko na chuyen. Iss chaal mein jo rutba tha, wo shabdon mein bayaan nahi kiya jaa sakta.

Тэги: